Vir dekades lank het ons elke aand vir Riaan Cruywagen op die radio en TV gesien. Die vriendelike oom wat so mooi Afrikaans praat. Die oom met sy warm glimlag wat jou sommer lekker laat voel het as jy nuus gekyk het. Nou het Riaan sy vlerke gesprei na musiek. The Beat het met die veteraan TV-aanbieder gesels oor sy nuwe CD, sy liefde vir musiek en of hy in die stort sing.
Jy
het ontpop in 'n musiek-kenner van formaat! Waar kom jou belangstelling in
musiek vandaan? Ek dink nie ek het skielik ontpop
nie, want ek het met musiek grootgeword en ook lank musiekonderrig ontvang. Ek
is trouens ‘n opgeleide kerkorrelis. My pa was ‘n tenoor van formaat wat selfs
Mimi Coertse se bewondering in haar jongdae afgedwing het. Musiek is dus diep
in my gene vasgelê. Gevolglik het ek in die tien jaar voor die koms van
televisie as radio-omroeper by die destydse Afrikaanse Diens ook talle
musiekprogramme aangebied, lig sowel as klassiek.
Kan
jy nog onthou wat die heel eerste langspeelplaat is wat jy gekoop het? Ja, dit was ‘n
langspeelplaat van die Amerikaanse orrelis Virgil Fox, getiteld Vale of Dreams,
waarop hy werke soos Meditation van Massenet, Liebestraum van Liszt, Clair de
Lune van Debussy en vele ander op die groot Aeolian-Skinner pyporrel in die
Riverside-kerk in New York uitvoer. Dit het my só meegevoer dat ek destyds die
orrelbladmusiek van dié stukke aangekoop en ingestudeer het. Ek het vandag nog
die plaat.
Wie
is jou gunsteling Afrikaanse musiekster? Dis ‘n moeilike vraag, want daar is so baie
van wie ek hou. Dalk is dit tóg maar die pianis Rocco de Villiers. Hy is ‘n
briljante klavierspeler en kan van die moeilikste klassieke werke tot die mees
ritmiese ligte-musiek meesterlik vertolk. En dan is hy nog boonop so vermaaklik
en flambojant op die verhoog ook.
Wie
is die musikale persoon in jou huishouding?
Ongelukkig net ek.
Hoe
hou jy tred met al die nuwe musiek wat deesdae uitkom? Ek hoor dit maar oor die
radio. My ore dien egter as genadelose filters en ek neem net kennis van dit
waarvan ek hou. Die res gaan by die ander oor uit en verdwyn in die
vergetelheid.
Wat
is jou gunsteling liedjie om te sing in die stort? Ek sing nie, punt. Nie eens in die stort nie.
Ek luister liewer na mense wat kán sing.
Comments
Post a Comment